Тöв пуксигöн тшöкыда поводдяыс зэра да няйт. Луннас усьö ва лым, войнас кынмö, а сэсся выльысь сылö. Та вöсна йиыс ю вылын оз вермы тырвыйö бура кынмыны. Тайö кадыс ю сайын меститчöм сикт-грездын олысьяслы вайö уна нок. Нöшта на и мездысьяслы да кусöдчысьяслы уджыс содö. Мужичöйяс неыджыд кынмалöм бöрын нин индысьöны петны чери кыйны йи вылö. Но колö тöдны, мый температура вежласьöмысь йиыс артмö киль кодь, мортöс оз кут. Нöшта дыр оз йизьы берег пöлöн быдмысь пуяс гöгöр, юö шор усянiнын, лымйöн тыртöминъясын. Рыжмöм йилöн рöмыс еджыд либö вижов. Энö мунöй сэтчö, кöнi лым вылö петöма ва. Татшöминас йиыс абу ён. Тöдöй, сöмын 15-20 градус кынмалöм бöрын позяс повтöг петны ю вылö. Лöзоват либö турунвиж рöма йи лыддьысьö ёнöн.

Уськöда тöд вылö чери кыйысьяслы некымын индöд. Ю дорö мöдöдчигöн кыйсян кöлуй кындзи сьöрысь колö босьтны спасжилет да сотöвöй телефон. Телепонтö меститöй бура, мед оз кöтась. Висьталöй гортсаыдлы, кытчö мунанныд да кор локтанныд. Ю вылö медбур лоö петны лун югыднас. Йи вывттi мунiгöн зумыдлунсö видлалöй беддьöн. Вына кучкалöмысь тыдовтчас, позяс-ö тувччыны йи вылö. Кылö кö чажгöм шы, бергöдчöй бöрлань. Йи вылын оз ков чукöртчыны öтилаö уна мортлы да вöчны орччöн уна лунка.

Суис кö неминуча да колö отсöг пыр жö звöнитöй мездысьяслы 112 телепон пыр. Висьталöй диспетчерыл лоöмтор йывсьыс, стöчмöдöй кöнi тайö лои. Шуам, трачнитiс кö йиыс кок улын, видлöй ас ас вынöн отсавны мортлы. Петны ваысь позьö бедь, пöв, шарп либö тасма отсöгöн. Шыбитöй помсö да ньöжйöникö кыскöй вöйысьöс. Сэсся сьöрсьöн бöрсьöн кынöм вылын кыссьöй берегланьыс, сiйö жö тййöдыс, кытi локтiнныд.

Мездысьяс локттöдз берегас позяс туплясьыштöй лым пиын. Сiйö кыскас паськöмысь васö. Сэсся отсалöй мортлы ёна зыравны ки-коксö, медым мортöс кыдзкö шонтыны. Сёрнитöй, медым лöньöдны мортöс, сетöй пöсь юантор, позяс кö öзтöй бипур.

Тайö кадö колö ёна видзчысьöмöн кутны асьтö ю дорын. Бергыс вильды, верман тöдлытöг ысковтны йи вылö. Öлöдöй и челядьöс йи вылö петöмысь да берег дорын ворсöмысь. Видзöй асьнытö да матыссаястö да лоöй дзоньвидзаöн.